śrīdakṣiṇāmūrttaye namaḥ || ||

acintyāvyaktarūpāya nirguṇāya guṇātmane ||
samastajagadādhāramūrttaye brahmaṇe namaḥ || 1 ||

alpāvaśiṣṭe tu kṛte mayo nāma mahāsuraḥ ||
rahasyaṃ paramaṃ puṇyaṃ jijñāsur jñānam uttamam || 2 ||

vedāṃgam agryam akhilaṃ jyotiṣāṃ gatikāraṇaṃ ||
ārādhayan vivasvaṃtaṃ tapas tepe sudustaraṃ || 3 ||

toṣitas tapasā tena prītas tasmai varārthine ||
grahāṇāṃ caritaṃ prādāt mayāya savitā svayam || 4 ||